ޣައްޒާގެ މެދުތެރޭގައި ހުންނަ "އަލްއަޤްޞާ ޝަހީދުންގެ ހޮސްޕިޓަލް" ހިމެނޭ ސަރަޙައްދުގައި، ބަނޑުހައިހޫނުކަމާއި ހާލުގައި ޖެހިފައިވާ ޢާއިލާތަކުގެ ބަނޑުފުރާނަ މުއްތިކުރުމަށްޓަކައި ހިލޭސާބަހަށް މަސައްކަތްކުރާ ބަޔަކު ދިޔައީ ކާބޯތަކެތި ތައްޔާރުކުރުމަށް އުނދުުންތައް ރޯކުރަމުންނެވެ. އިންސާނިއްޔަތުކަމުގެ ލޭ ހިނގާ، ހިތްހެޔޮ ބައެއްގެ ބުރަ މަސައްކަތުން ހިންގަމުން ދިޔަ އެ ޚައިރާތު ބަދިގެ، އަނިޔާވެރި ޞަހްޔޫނީން ދިން ކުއްލި ހަމަލާއަކާއެކު ބަދަލުވެގެން ދިޔައީ އިންސާނުންގެ ހަށިގަނޑުގެ ބައިތަކާއި ކުނިބުނިތަކުން ފުރިފައިވާ މައިދާނަކަށެވެ.

އަނިޔާވެރި ޞަހްޔޫނީން މަސައްކަތް ކުރަމުންދަނީ ފަލަސްޠީނުގެ ރައްޔިތުންގެ އުންމީދުތައް ފުނޑުފުނޑުކޮށްލުމަށެވެ.

ބަނޑުހައިވެފައި ތިބި ކުޑަކުދިންގެ ބަނޑަށް އެ ކާނާ ފޯރުމުގެ ކުރިން، އަނިޔާވެރި ޞަހްޔޫނީން ވަނީ އެ ކާބޯތަކެތި ތައްޔާރުކުރާ ތަނަށް ޢުދުވާނީ ހަމަލާތަކެއް ދީފައެވެ. މި ހަމަލާގައި، އިންސާނިއްޔަތަށްޓަކައި އެހީތެރިކަން ފޯރުކޮށްދިނުމުގެ މަތިވެރި މަސައްކަތުގައި ސާބިތުވެ ތިބި މީހުންގެ ތެރެއިން ތިން މީހުން ޝަހީދުވިއެވެ.  އަދި އެތައް ބަޔަކަށް ވަނީ އެކިވަރުގެ އަނިޔާތައް ލިބިފައެވެ. 

ހާލުގައި ޖެހިފައިވާ މީހުންނަށް ބަހާ "ޕާންކޮޅެއް" ނުވަތަ "ކާ އެތިކޮޅެއް" ދެކެ ބިރުގަންނަނީ ކޮންފަދަ އަނިޔާވެރި ބައެއް ހެއްޔެވެ؟ އަދި ނިކަމެތިންގެ ކާނާއާ ލޭ އެކުވެގެންދާއިރު، މުޅި ދުނިޔެ މިފަދަ ހިމޭންކަމެއްގައި އޮތުމަކީ ކޮންފަދަ ބޮޑު އިހުމާލެއް ހެއްޔެވެ؟

މާތް الله ޝަހީދުންނަށް ސުވަރުގޭގެ މަތިވެރި ނިޢުމަތް މިންވަރުކުރައްވައި، ޒަޚަމްވެފައިވާ މީހުންނަށް އަވަސް ޝިފާއެއް ދެއްވާށިއެވެ. އަދި ޣައްޒާގެ އަހުލުވެރިން، އެއްވެސް ރަޙުމެއް ނެތް އަނިޔާވެރިންގެ ކިބައިން ސަލާމަތްކުރައްވައި ރައްކާތެރިކަން ދެއްވާށިއެވެ.